صوت:

لا تامن الحية ولا تامن الداب
والعقرب اللي حول بيتك مداها
اقطع ذنبها بالحجر وانتف الناب
واخرج خلايا سمها من حشاها
واقفل بوجه الخاين الخادع الباب
واوسم وجوه الغادرين و قفاها
ماكل من مدو لك ايديهم أصحاب
تبين مدات الوفاء من دفاها
وإلا الردي لو مد بالورد كذاب
حتى وروده بالخيانه سقاها
لولا جحود الطيب ماشاب من شاب
واهل الخيانة ماتشيب لحاها
إذا عزمت احذر تردد و ترتاب
أهل العزايم ما تناظر وراها

سعيد بن ناصر القرني

صدى:
لاطاب نوم الهيس ياسعيد لاطاب
و السالفة تُبنى على محتواها
خطيت لك يا سيد الشعر بكتاب
وغير الحقائق ما كتبنا سواها
شيٍ تعلمته من البدو الأعراب
وإلا من الحضر القروم النباها
حقائقٍ ماهي هناديب واتساب
ولا كِذا جت من خلاها بخلاها
ما للفتى بدٍّ على فعل الأسباب
و الذاهبة تلقى عشاها و ماها
أما مقادير الولي رب الأرباب
لا بـد لـ: عيـون الخـلايق تـراها
وإذا الوطن تنبح حوالينه كلاب
أمرٍ طبيعي ما لها إلاّ عواها
ولوكل من مدولك ايديهم اصحاب
كان الخلائق شامخة في سماها

فهد بن رميزان الشمري