المساعد الشخصي الرقمي

مشاهدة النسخة كاملة : مطفوق + نصاب = عسل و فاصوليا



عواكيس
01-05-01, 12:06
مطفوق + نصاب = عسل و فاصوليا
بسم الله الرحمن الرحيم
السلام عليكم و رحمة الله و بركاته
أسم الموضوع ما له خص في الموضوع بس تذكرت واحد مطفوق وتسيف إنه يحب العسل والفاصوليا أبي اطب بالموضوع عقده بسم الله هذي بعض السواليف الي قريتها واللي سمعتها
# كان فيه ثلاث بنات يهبلن مملوحاتٍ ممشوقاتٍ كلهن ملحٍ وقبله طول وعز وجمال شفايفهن صغيرة وخشمٍ تقل سلة السيف وعيونٍ تقل فناجيل عجز هالعين تأخذ نص الوجه كاملاتٍ مكملات والكامل وجه الله سبحانه وتعالى لولا إن فيهن عيبٍ بسيط هو نطق بعض الحروف لا تكلمت الوحده فيهن جابت العيد ماهناش ولا حرفٍ سنع أنواع الهواش بين الحروف وبهن قل الدبره الله يعظم أجرهن عاد أمهن قالت شوفن يابنياتي إياني وإياتسن وحدةٍ تتكلم إذا جت الخطابه عضن على براطمكن خوفي تسمع كلامكن بعدين تهوّن وتغير الرأي وتقعدن بحلتسي قالن ثمي (سمي) ياميمتي في مرةٍ من المرات القادمة جت الخطابه وكانت أمهن ماهيب موجوده (والله من زين الحظ) قعدت الخطابه في صدر المجلس وهن قاعداتٍ يغزلن في حبال القطن (أنواع الجحيد للخطابه والله من زين الدبره) قالت وحده من البنات: أنططع حبل الططن أعططيه ياطاطعته قالت الثانيه: أنا ما ططعته فاعططه قالت الثالثه : أماه أمي تدول لا تتلمن إدا دت الحتيبه (اتحدى واحدٍ منكم يفك الشفره) والخطابه داعده (قاعده أعدوني الله يصلحهن) تسمع الحوار الشيق يبن الفتيات اليانعات أومير تأخذ الخطابه العباة وننسف الغدفه وتعض البراطم وتنطلق خارجه غير أبيه وأقعدن هالبنيات في حلتس أمهن الله .
# وهذا واحدٍ كان عنده جمس (صالون سوبرمان) قديمٍ بالحيل وشكله شييييييييين مصقّعن بوه لين داخ والمقاعد أنواع التشقق (تقل إني راكبن بوه) والشمس إستاثمت فيه لين غيرت لونه ومن زين الدبره عياله وأم العيال مزعجين هالأب المسكين اللي مصفقته هالدنيا لين داخ غيّر هالسيارة ما نبي هالسيارة وعلى هالحال وعياله ماشاء الله ذر إذا ركبوا السيارة تقل إنهم فريق الدرعيه(الباص حقهم موديل77ويتراجمون عليه 32نفس) و هالرجال يقول يصير خير إن شاء الله يفرجها ربكم وتراني قاعدٍ أدور سيارةٍ زينةٍ توسعنا وهالرجال ما عنده غير هالأرانب لا دور ولا هم يحزنون بس عياله علل يزنون زن نشباة (تقل إنهم المطفوق خوينا لجنة التحكيم تسوي اللي تقدر عليه علشان ترضيه بس ما يرضى ياعلّه ينرض) هالرجال قاعد يفكر ويحرك هالدميجه قال مابدهاش لقيت فكره جهنميه أبي أحط هالسيارة عند راعي ورشه وأبخليها جديده أبغير المراتب واللون وكل شي وبغير صوت البوري (هذي أهم شي في الموضوع) علشان قماشه ماتحب تسمع صوت البوري على هالصبح ياحياتي ياديانا و ركب شكمانٍ جديد له صوتٍ يطرطر علشان صلوحي يطرب على هالصوت يخش جو إذا سمع صوت الطرطره بعد ما صلح وغير كل شيء قال لعياله وش أبشركم شريت سيارة جديده أستانسوا عياله وإسفهلوا وام العيال قلبتها هجيني طق ورقص قال هاه وش رايكم أخذ بكم دوره بالتخصصي والعليا ركب عياله وأم العيال و بنات الجيران (راح تقولون وش دخل بنات الجيران أقولكم فاطمه تحب تتبيزع قدام البنات أول ما قال أبوهم شريت السيارة إنقزت وكلمت موضي ومنيره وإقعدت تناغرهن وتحرّهن يعني إني عندنا سيارة جديدة موضي إنقهرت أما منيره ماهمها الباصقه باردةً تقل إنها تقول لفاطمة يابقّتن بالدعيسه إنتي وسيارتكم" قالت فاطمه لأبوها ودي نمر على صديقتي موضي وصديقتي منيره ودي يتمشّن معنا ويشوفن السيارة الجديدة عاد ما قصر أبوها مر هالبنات وأخذهن معهم في الرحله الشيقه) موضي من أول ما ركبت السياره وهي ما غير تدعي تقول ياربي ياحبيب يا علّهم يقلبون أما منيره والله ما درة عن أحد تسنها ماهيب موجوده ماهناش مكينه والعيال ما غير مناقز بهالسيارة تقل إنها F15 فرحانين لا وأحلى شي أم العيال أول ما شافت السيارة قالت بخٍ بخٍ وش هذا كله والله يهالسيارة تقل إنها أنا يوم أتزوج أبوكم أهبل أطير من العقل إنتبهوا ياعياليني لا توسخون السيارة تراها جديده ماهيب مثل السيارة الخجماء يالله لك الحمد اللي فكيتنا منها وهالرجال هاجٍ خشته فرحانٍ بالخطه وتسيف مشت عليهم وصلوحي سادحٍ راسه على الطبلون ويقول لأبوه أدعس يوبه أدعس يمناك لا عدمناك عاد أبوهم بدأ يتميلح أماه انا قايل لكم إصبروا لين ألقى لكم سيارةٍ زينه وجديده والحمد لله سهل الله امرنا طبعاً هو يسولف وهو يسوق بالسيارة يتمشى فيهم ومع الإندماج بالسواليف أكل هاك المطب اللي ماهوب لم جاده أومير تطلع من تحت المراتب نعلة أم عياله الله يكرمكم كانت مضيعتها من فتره ودوّرتها ولا لقتها عاد هالأم أستشاطت و ولّعت ورفعت الأم النعله الله يكرمك فوق (تقل إنها العقيلي يوم إنه فرحٍ الكرت الأصفر ما غير يوزعه على لاعبين الهلال الله لا يربحه) توريها عيالها وقالت بنات عيال هذي سيارتنا القديمه والدليل هالنعله الله يكرمكم حقتي لقيتها تحت المراتب يالله إنزلوا والله ما نركبها مرةٍ ثانيه عاد أنزلوا في طريق خريص وأبوهم ماغير يلاحقهم .
# وهذي وحدةٍ راح تحطب وتجمع العشب مع زميلاتها وهي قاعدة تجمع العشب شافت لها ورر(ورل) و إقعدت تلاحقه هالمقروده تحسب إنه ضب تعرف إن زوجها يحب الضبان وهالورل ما غير يهج منها وهي ما غير تطارد فيه ومن شجرة إلى شجرة وخوياتها يصرخن عليه إعجلي وإجمعي العشب علشان نرجع أخر شي مسكت بالورل وحطته بالمخباة و إقعدت تجمع العشب وكل ما طلّع الورل رأسه علشان يهج أو يتنفس أضربته بالمحش ويرجع مكانه مرةٍ ثانيه وعلى هالحال لين وصلت البيت يوم وصلت البيت أربطت الورل بالغدفه علشان ما يهج يوم جاء الزوج إنقزت هالحرمه قالت إبشر يابوفلان صدت لك صيدةٍ ماهيب طبيعيه شفها بالغرفه مربوطه يقول يوم رحت للغرفه شفت هاك الورل هاج كشرته تقل وده ينط عليّ يقول الزوج رجعت على وراء لين طلعت من الغرفه وقلت لزوجتي وش اللي أنتي جايبه قالت ضب والله لي أكثر من نص ساعه وانا أطارده لين صدته وحطيته في مخباتي (طبعاً أول الحرمه ثوب واحد لمدة ست شهور وفيه مخباة علشان البسباس والحركات ماهن مثل بنات هالجيل الحالي بناطيل وتنانير وجوالات والوحدة إذا شافت الذباب الله يكرمكم ما تقعد لين يطلع وتقول يمه يعض) قال هذا ورل موب ضب قالت ورل ورل موب ضب ضب (أم جريوه) قال ايه ورل ورل قالت ياويلي ويلاااااااااه فك غدفتي منُه والله ما ادخل الغرفه لين يطلع منها وانا حاطةٍ هالورل في مخباتي الحمد لله اللي ما ذبحني راح الزوج وفك الغدفه وحطه في كيس يوم طلع من الغرفه وشافت الزوجه هالكيس إنقزت تقل أم 13 وهجّت للطايه من الخوف والزوج ما غير يضحك يقول ننعن أبو شيطانتس من اليوم وانتي تنقّلينه والحين تناقزين عنّه.
# وهذولا شلةٍ من المطافيق والنصابين اللي ما عندك احد كل واحدٍ منهم يلف قبل العاير مجتمعين وحاطين عزيمه وحركات يوم إنهم خلصوا متعشين إسترخوا وتمددوا وبدت السواليف ايه هي بدت السواليف عينك ما تشوف إلا النور قال الأول منهم الإسبوع اللي راح كان عندي إختبار بعد العشاء بنفس توقيت مباراة (النصر X النصر) وما حضرت الإختبار بعدها بيومين رحت للدكتور وكان بريطاني قلت له (أي هاف إنفلوب كايروا) يعني عندي ظروف قاهره قال الدكتور (نو أي كانت دو اني ثنق فور يو يو ويل تاك زيرو إن إكزام) يعني ما اقبل العذر وراح تأخذ صفر في الإختبار قال خوينا (أفتر أفتر زيرو زيرو يو وفاسك) يعني بعد بعد صفر صفر أنت وخشتك قال الدكتور (ماي مايند اف يو هاف اني ثنق قو طلعه) يعني مزاجي واللي عندك جبه و إذا موب عاجبك بالطلعه قال الثاني على طاري الدكتور البريطاني تصدقون ياشباب إن سوريا يستغلون جميع الموارد اللي عندهم حتى أنهم يزرعون الخوخ وإذا أثمر باعوه والباقي يعصرونه ويسوون منه عصير خوخ والباقي يصنعون منه مربي خوخ حتى عبسة الخوخ (بذرة) يسوون منه مربى جح (بطيخ) قال الثالث على طاري الجح سمعتوا عن الإختراع الجديد حق الصوت يقولون إكتشفوا امريكا جهاز يجمع الطاقه الصوتيه ويحللها ويعيد ترتيبها و يخلينا نسمعها من جديد يعني الحين يمدينا نسمع أي صوت لأن الصوت هو عبارة عن طاقة متكومةٍ بالجو والمفروض هالصوت يطلع من فتحة الأوزون ويتشر في الفضاء الخارجي بس يقولون إنه ما طلع ليش ما أدري حتى أن العالم الأمريكي يقول نقدر نسمع سواليف هارون الرشيد قال الرابع سمعتوا عن الرجال اللي كان يتمشي في البر وهو يمشي بالنهار شاف له قطعه من ظلام ضايعه أومير يجي ويربط القطعه ويجرهالين جاء الليل وبعدين تركها وراحت مع الظلام يوم تعب من المشي تركّى له على حصاةٍ كبيره ونام يوم أصبح لقى إن الحصاة موب حصاة إطلعت فقع يقول قعدت أكل لين شبعت وقطعت منها وأخذت لعيالي وكفانا شهر قال الخامس قبل كم سنه يوم كنا في الإبتدائيه كان فيه حفل الأباء رحت أنا وأخوي للمدرسه كنا انواع الكشخه حركات لابسين بدلات زري وكرفته وحاطين كالونيا تفوح ريحته لين أخر الشارع وراكبين سيارة فورد أنواع العز لا وازيدكم من البيت شعر راكبين ورى يوم وصلنا المدرسه نزل السواق وفتح لنا الباب والعالم ما غير تبحلق فينا انواع الشفاحه الله يجيريكم شهبٍ أنواع المشق يقول أول ما نزلت وأشوف لك هاك البسه (قطوه) وأفسخ الكندره الله يكرمكم واطارد البسه عاد انا ديني ولا دين البساسه إذا شفتهم تحركت مشاعري أخر شي إندسة البسه تحت السياره قلت أوه كود اندس أومير أندس معاها وعينك ما تشوف غير حرب البسوس تحت السيارة لين مسكتها وطلعت من تحت السيارة و انا فاجٍ كشرتي وماسكٍ البسه (نعن ابو ذا القراوى إذا تمدنوا) والسادس رأسه كبير مرررررره يقول رحت أقدّم على كلية الملك فيصل الجويه قال لي الضابط اللي يقابلني انت مقبول من دون شروط بس بشرط إنك تدخل الخوذه في راسك وقعدت أفرتس رأسي بفازلين بس ما دخلت الخوذه قال السابع تخيلوا ما فيه جاذبيه وش راح يصير فينا أترك التخيل لكم (والله ياهي شلة وناسه)

# معاني الكلمات
تسيف : كيف
أطب عقده : اطب متساوي
قبله : أتجاه الصلاة ويقولن مطخه يعني بوسه تجي كذا وتجي كذا على حسب الوضوء
ماهناش : مابوه
الهواش : المزاعل
سنع = زين
قل الدبره = سوء التصرف
إياني و إياتسن = ياويلكن
براطمكن = شفايفكن
الغدفه = الغطوة أو الطرحه
مصقّعن بوه = أنواع الصدمات
البوري = الطنيبه
تتبيزع = تتمختر
تناغرهن = تحرّهن
بقتن بالدعيسه = مثل عربي مشهور معروف للجميع
الخجماء = ما أدري وش معناها بس قريتها كذا
لقتها = وجدتها
إستشاطت = إنقهرت
الطايه = السطح
الشفاحه = الشهابه
شهب = مشافيح
المشق = التشققات الجانبيه في الطبقة الجلديه ناتجه عن الوساخه الأزليه
قلت أوه كود اندس أومير أندس = بيت من الشعر النبطي لشاعر فرنسي



أتمنى أن تعجبكم هالشخاميط ولا تشرهون على الإسلوب والله يعطيكم العافيه يارب والسلام عليكم ورحمة الله وبركاته

أنا...هنا
24-06-02, 05:16
نفضت الغبار عنه

اكيد كلكم ما قريتوه

أحاسيس
24-06-02, 05:35
يالله..

مرت سنة وزود..

والشخص غايب !


الله يرده بالسلامة يارب..


تسلم أخوي..



موضوع حلو مع انه يحتاج لملخص

أنا...هنا
24-06-02, 05:42
سجل واحد سوداني

أحاسيس
24-06-02, 05:48
عادي حبايب قلبي الزول










بأحبهم موووووووووووت

aboabdullah
24-06-02, 05:59
من قال سودانية

أنا...هنا
24-06-02, 06:02
.,gdi

يعني زوليه

أحاسيس
24-06-02, 06:07
عربي الله لا يهينك








سنمور صباحك فل

أنا...هنا
24-06-02, 06:09
وأنا ما لي رب

خلاص من حبكم يا زين عزلن

aboabdullah
24-06-02, 06:11
انا وش قلتلكم روحوا لشاتكم

أحاسيس
24-06-02, 06:12
ايس في !!

من زعلك عنوني؟

أنا...هنا
24-06-02, 06:16
اعزائي الزوار سننتقل الآن الى الجلسة المغلقة

أحاسيس
24-06-02, 06:38
تيب

أنا...هنا
24-06-02, 06:41
تيب الله اصلك

أحاسيس
24-06-02, 06:47
واسعدك دنيا وآخرة

أنا...هنا
24-06-02, 06:50
وياكي

بنت اهلي
24-06-02, 06:50
مار انا غاسله يديني من بيقراء هاه كلوه :1:: :1::

أنا...هنا
24-06-02, 06:52
ولا تنسين تغسلين شعرك

أحاسيس
24-06-02, 06:54
يازين دش على هالصبح

أنا...هنا
24-06-02, 06:56
بس الجو بارد

بنت اهلي
24-06-02, 06:58
يحييييييييييي يحييييييييييييي يحيييييييييييي بررررررررررررررررررررد:90: :90:

أنا...هنا
24-06-02, 07:00
شغلي الصخانه

أحاسيس
24-06-02, 07:04
حلو البرد

أنا...هنا
24-06-02, 07:08
بعدين خشه

أحاسيس
24-06-02, 08:24
شو خشه؟

أنا...هنا
24-06-02, 08:31
يعني برد يدخل بعظامك

زعيم القرن
24-06-02, 08:48
دش على الصبح حلو ...

بس على أي قناة ...!!!!

أنا...هنا
24-06-02, 08:52
هلا والله بالزعيم

احلى صباح

زعيم القرن
24-06-02, 08:58
هلا فيك " انا .. هنا "

اجمل صباح

والنهار توه بأوله :)

المطفوق
02-07-02, 12:13
فيه احد بيجرني :1::